Themelimi i Xhamisë
Xhamia “Jugendkulturzentru Haus des Friedens – Qendra Kulturore Shtëpia e Paqes” është themeluar që nga viti 2004.
Duke e parë të nevojshme që xhamia të jetë sa më afër besimtarëve dhe që t’u jepet mundësia besimtarëve që t’i kryejnë adhurimet e tyre fetare, një grup besimtarësh kishin marrë vendim që të gjejnë një lokal në një zonë ku do t’u përgjigjej shumicës së besimtarëve. Pas një kohe të shkurtër, edhe u gjet lokali adekuat në Schwamendingenstr. 112. Një lokal, i cili fillimisht i plotësonte nevojat e xhematit, mirëpo falë angazhimit të besimtarëve, imamit dhe bashkatdhetarëve, anëtarët e kësaj xhamie vazhdimisht shtoheshin dhe pas disa vjetëve u shfaq nevoja që të kërkohej një lokal më i madh, në një zonë më të frekuentuar (më në qendër), ku do të ishte më e lehte vizita në xhami përmes komunikacionit të hapur.
Që nga viti 2013 xhamia ndryshoi adresën dhe u transferua në lakalin tjetër në Saatlenstr. 23, 8051, Zürich.
Anëtarësimi në organizata të ndryshme
Xhamia “Jugendkulturzentru Haus des Friedens – Qendra Kulturore Shtëpia e Paqes“ është anëtare edhe e organizatave të ndryshme, si; Vereinigung der Islamischen Organisationen in Zürich VIOZ dhe Dachverband der Albanisch-Islamischen Gemeinschaften in der Schweiz DAIGS. (Unioni i Bashkësive Islame Shqiptare në Zvicër).
Edhe pse xhamia është shtëpi e Zotit dhe vend ku çdo besimtar e besimtare ka të drejtë t’i kryejë ritet e tij/saj fetare, mirëpo shumica e besimtarëve, mbi 90% që frekuentojnë xhaminë tonë, janë shqiptarë nga trojet tona etnike, si nga Shqipëria, Kosova, Maqedonia, Lugina e Preshevës. Mund të thuhet, në xhaminë tonë është formuar një Shqipëri e Vogël Etnike.
Xhamia jonë që nga hapja e saj i ka pasur dyert e hapura për të gjithë besimtarët, pa dallim gjinie apo moshe.
Ka kontribuuar shumë në organizimin e jetës fetare në lagjen tonë, por edhe më gjerë, e gjithashtu ka kontribuuar edhe në aspektin kombëtar, kulturor e human.
Bashkëpunimi me institucionet e tjera
Si institucion i vogël fetar, jemi munduar të kemi raporte dhe bashkëpunim të mirë edhe me institucione të tjera relevante, si bashkëpunim me shkollat dhe Drejtorinë e Arsimit të Schwamendingenit, me Kishën Reformierte të Schwamendingenit.
Po ashtu kemi bashkëpunim me Zürcher Forum der Religionen, DAIGS -UIBSHZ, VIOZ dhe FIDS
Bashkëpunimi dhe raportet e mira me ambasadat dhe konsullatat e vendlindjes
Ne do të vazhdojmë edhe në të ardhmen që të bashkëpunojmë me institucione e organe të tjera në dobi të komunitetit dhe shoqërisë ku jetojmë.
Synim i Xhamisë sonë është që të jemi transparentë, tolerantë, të mirëkuptueshëm dhe pozitivë në shoqërinë ku jetojmë.
