Xhamia jonë organizoi një shëtitje të bukur për nxënësit në Trampolino, si një dhuratë e veçantë me rastin e festës së Bajramit. Ishte një ditë e mbushur me gëzim, buzëqeshje dhe lojëra pafund. Atmosfera ishte e jashtëzakonshme – fëmijët shijuan çdo moment, duke u argëtuar me njëri-tjetrin dhe duke krijuar kujtime të bukura që do t’i mbajnë mend gjatë.

Në këtë aktivitet morën pjesë shumë nxënës, të vegjël dhe të mëdhenj, të cilët gjatë gjithë vitit kanë treguar përkushtim dhe pjesëmarrje të rregullt në mësime dhe aktivitete fetare. Shëtitja ishte një mënyrë për të shprehur mirënjohjen ndaj tyre dhe për të shpërblyer përpjekjet e tyre.

I pranishëm ishte edhe Hoxha ynë së bashku me ndihmësit e tij, të cilët u kujdesën që gjithçka të shkojë në mënyrën më të mirë të mundshme. Ata kaluan kohë me fëmijët, u bashkuan në lojëra dhe krijuan një ndjenjë të ngrohtë familjare mes të gjithëve.

Kjo ditë nuk ishte vetëm një argëtim, por edhe një shembull i vërtetë i bashkësisë, vlerësimit dhe dashurisë që kultivohet përmes fesë. Lutemi që Allahu t’i shpërblejë të gjithë ata që kontribuuan në realizimin e këtij aktiviteti dhe të na mundësojë edhe shumë ditë të tjera kaq të bukura!